airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Kikkut ilaqutariittut meeqqanik paarsisartunngorsinnaappat?


Sullitat 

Kikkulluunniit 18-inik ukioqalereersimasut ilaqutariittut meeqqanik paarsaqartartunngorsinnaapput. Ammip qalipaataa, suiaassuseq, upperisaq, angutaaneq, arnaaneq il.il. apeqqutaatinnagit ilaqutariittut meeqqanik paarsaqartartussatut akuerineqarsinnaapput.

Ilaqutariittut meeqqanik paarsaqartartunut inatsisit malillugit tunngaviusumik ukiukinnerpaaffeqaranilu ukioqqortunerpaaffeqanngilaq. Inuit isumaginninnissamut piginnaasaqarluartut meeqqat inuusuttullu pisariaqartitaannik paasinnissinnaassuseqarluartut meeqqanik paarisaqartarnissamut periarfissaqarput.

Meeravissiartaarnissamut inatsit tunngavigalugu innersuussinermi, nammineq qitornarisap nukarliup utoqqaassusia angajoqqaarsiaasussallu utoqqaanerpaasup ukiui isiginiarneqartarput. Meeqqamik paarisaqarnissamut tunngatillugu isumaginninnikkut piginnaasat, pisariaqartitat allallu aamma isiginiarneqartarput.

Meeqqanik paarisaqarumasut utoqqaassusaasa meeqqanik paarisaqarsinnaanissamut qanoq sunniuteqarnera pillugu kommunit nalilersuisarnissaat aamma piumasaqaataavoq.

Paarisaqarumasut ataasiakkaarlugit piviusorlu aallaavigalugu nalilersuisoqartassaaq. Meeqqanik paarisaqarumasut utoqqaassusaat meeqqanik paarisaqarnissamut sunniuteqarpallaarniavianngitsoq suliani ataasiakkaanik nalilersuinerni inerniliunneqarsinnaasarpoq.

Tamatumani ilaqutariit meeqqanik paarisaqarumasut peqqissuullutillu tatiginartuunissaat piumasaqaatinillu tamanik naammassinnissimanissaat pingaaruteqarpoq. Ilaqutariit meeqqamik angerlarsimaffiup avataanut inissinneqartumik paarisaqarsinnaasutut nalilerneqarsimanerat pingaaruteqarportaaq.

Ilaqutariit meeqqamik paarisaqarumallutik qinnuteqartut aappariugunik, tamanna iluaqutaassaaq, aammali inuit ataasiakkaat meeqqanik paarisaqartussatut akuerineqarsinnaasarput. Tamatumani meeqqamik paarsiniartup piginnaasai, misilittagaqassusia aammalu ilaqutariinnut meeqqanik paarsisartunut attaveqarnikkut qanoq misilittagaqartiginera isiginiarneqartarput.

Ilaqutariinni meeqqanik paarsaqartartuni aappaariit aapparikkunnaarsimappata aappaata meeraq paarisartik paariinnassallugu aalajangersinnaavoq, tamannaalu pisinnaavoq meeqqamik paarsiinnarnissamik kissaateqartoq akuerissappat. 

Inuit ataasiakkaat meeqqamik paarisaqarnissaannut akuersiniarnermi qinnuteqartup aappariittut meeqqanik paarisaqartartutulli paarisaqarnissamut nukissaqassusia isumaginnilluarsinnaassuseqarluassusialu isiginiarneqartarput.