"Inoqatinut attaveqaatinut ilitsersuut" meeqqat inuusuttullu qarasaasiatigut naapittarfinni isumannaatsumik atuisarnissaannut iluaqutaasussaq Paarisap Red Barnet suleqatigalugu saqqummersippaa.
Inoqatinut attaveqaatit inuusuttorpassuit ulluinnarni inuuneranni ilaalluinnarpoq aammalu nuannersinnaalluni ilikkagaqarfiusinnaasarlunilu. Ajoraluartumilli meeqqat inuusuttulluunniit ilaat qarasaasiatigut attaveqarnermi nuanninngitsunik imaluunniit killissanik qaangiisunik misigisaqarsinnaasarput. Ilitsersuummi nutaami inoqatinut attaveqaatini sakkussat isumannaannerulersitsisussat allaniillu iserfigiuminaannerulersitsisussat kiisalu oqaaseqaatit (kommentarit) imaluunniit atuisut (profilit) qanoq nalunaarutigineqarsinnaanerinut alloriarnikkaartumik ilitsersuussutigineqarput.
Amerlasuunut anngussinnaaniassammat kalaallisuunngortillugu nutsertinneqarpoq
Ilitsersuut Red Barnetip ataani SletDet-rådgivningen-imit ineriartortinneqartoq Paarisa qanimut suleqatigalugu kalaallisuunngorlugu nutsertinneqarpoq. Najoqqutassat meeqqat atuarfiinut sullissivinnullu assigiinngitsunut meeqqanik inuusuttunillu sullissisunut agguaanneqassapput.
2025-mi februaarimi saqqummersinneqassaaq
"Inoqatinut attaveqaatinut ilitsersuut" februaarip 17-ianni 2025-mi saqqummersinneqassaaq www.paarisa.gl-ilu aqqutigalugu pissarsiarineqarsinnaassalluni. Atuaganngorlugu perusukkaanni Paarisa attaveqarfigalugu inniminnerneqarsinnaavoq uunga allalluni paarisa@nanoq.gl
Paarisami immikkoortortaqarfimmi pisortap Helena Lynge Møllerip oqaaseqaataa
"Meeqqat inuusuttullu qarasaasiatigut toqqissisimasumik attaveqarsinnaasussaapput. Ilitsersuut taanna qarasaasiatigut isumannaallisaanerup nukittorsarnissaata tungaanut alloriarneruvoq pingaaruteqartoq aammalu nunarsuarmi suli qarasaasiatigut ingerlatsineruleriartorfiusumi pisariaqartitsisunut sakkussaqalersitsilluni."
Ilitsersuutip ingerlaavartumik nutarterneqartarnissaa
Inoqatinut attaveqaatini naapittarfiit akuttunngitsumik suleriaatsiminnik allanngortitsisarmata najoqqutassat nutaanerpaat pissarsiarineqarsinnaajuaannarnissaat qulakkeerniarlugu ilitsersuut Paarisap nittartagaani ingerlaavartumik nutarterneqartassaaq.
Paasissutissanik annertunerusunik piniaruit Paarisap email-ianut allassinnaavutit uunga: paarisa@nanoq.gl