Siusissukkut Iliuuseqarneq

”Ilaqutariinnut naartusortalinnut Siusissukkut Suliniuteqartartut” Peqqissutsimut Naalakkersuisoqarfiup, Isumaginninnermut Naalakkersuisoqarfiup aamma PAARISA-p akornanni suleqatigiinnikkut 2007-imi najoqqutassaq suliarineqarpoq.

Ilaqutariinnut naartusortalinnut Siusissukkut Suliniuteqarnermi qitiutinneqarpoq, suliaqarfiit assigiinngitsut akimorlugu suleqatigiinnerat, ilaqutariinnillu unammillernartumi inissisimasunik ikorfartuineq meeqqap inuunerani sapinngisamik siusinnerpaakkut.

Siusissukkut suliniuteqarnermut pilersaarut siusinnerusukkut Allorfimmi kingornalu Paarisami inissisimanisimasoq, 2022-mi suliassaqarfimmik allanngortiterinerup kingorna Siusissukkut suliniuteqarneq immikkoortortami pilersinneqaqqammersumi Isumaginninnermut Aqutsisoqarfimmi Meeqqanik Inerisaanermut immikkoortortamut inissinneqarpoq.

Suliniutit

Kalaallit danskillu 2019-imi isumaqatigiissutaannik sivitsuinermi suliaqarfimmi sulianik nukittorsaanissaq immikkut ittumik isiginiarneqarpoq. Suleqatigiinnerup nukittorsarneqarnera aallaavigalugu, Isumaginninnermut Aqutsisoqarfiup isumaginninnerup iluani meeqqanut inuusuttunullu suliaqarfimmiittut suliniutit aqqanillit ingerlappai.

Suliniutit tamarmik immikkut sulisumik ataatsimik arlalinnilluunniit inuttaqartut kommuninik, ulluunerani paaqqinnittarfinnik Danmarkimilu Socialstyrelsemik suleqateqarput. Suliniutigineqartut ilagaat suliniut 2, tassani nunatsinni illoqarfinni nunaqarfinnilu tamani Siusissikkut suliniuteqartartuni suliassaqarfiit assigiinngitsut suleqatigiinnerisa nukittorsarnissaat sulissutigineqarpoq anguniarneqarlunilu.

Pilersaarut

Ilaqutariinnut naartusortalinnut tunngatillugu Siusissukkut suliniuteqarnermut pilersaarutip siunertaraa, ilaqutariit qanimut suleqatigalugit meeqqap atugaanik siuarsaanissaq sumiginnaasinnaanermillu pinngitsoortitsiniarnissaq. Ilaqutariinnut naartusortalinnut sapinngisamik siusinnerpaamik pilersaarut atorneqartassaaq suliniutaassallunilu pinaveersaartitsisuusoq, ajornartorsiutit pinngornissaannik ineriartornissaannilluunniit pinngitsoortitsinissamik siunertaqartoq.

Siusissukkut suliniuteqartartut illoqarfinni tamani inuttaqarput ernisussiortunik, meeqqerisunik, meeqqerisut ikiortaannik, sulianik suliarinnittartunik, inunnik isumaginninnermut siunnersortinik, perorsaasunik, ilaqutariinnut katsorsaasartunik, aanngajaarniutinik atornerluinermik katsorsaasartunik, ilaqutariit suleqatigalugit suliniummik ataqatigiissaarisartuusunik.

Siusissukkut suliniuteqartartut siunertaat pingaarnerpaaq tassaavoq:

• Siusissukkut suliniuteqarnermi pisariaqartitsisunut najukkami angajoqqaanut neqeroorutinik ingerlatsinissanik qulakkeerinninneq.
• Najukkami nukiit pitsaanerpaamik atorneqartarnissaannik qulakkeerinninneq. Matumani periarfissaqartoqaraangat, nammineq piumassutsimik suliniuteqartartunik ilaatitsineq ilanngullugu.
• Najukkami suliniuteqarluni sulinermik ataqatigiissaarinninneq.
• Meeqqap angajoqqaallu pisariaqartitaannik aallaaveqartumik neqerooruteqartarnissamik qulakkeerinissaq.
• Ilaqutariit neqeroorutinik pissarsiarisinnaasaannik qulakkeerinninneq.
• Ataatsimut isigalugu ilaqutariit ilaatinneqarnissaannik qulakkeerinninneq aammalu suleqatigiinnerup ilaatut ilaqutariit pisumik namminneq misigisassinneqarnissaat.