airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Nalunaarut


Nalunaaruteqartussaatitaaneq sunaava? 

Nalunaaruteqartussaatitaaneq tassaavoq meeqqap inuusuttulluunniit ingerlalluarnissaanut ineriartornissaanullu isumakulunneq pillugu saaffiginnissut. Nalunaaruteqarnikkut meeqqap ilaqutariillu pisariaqartissinnaasaasa qulaajarneqarnissaat aammalu taperserneqarnissamik pisariaqartitsisoqarneranut atatillugu naliliiffigineqarnissaat qulakkeerneqassaaq.

Naliginnaasumik nalunaartussaatitaaneq aamma sakkortusisamik nalunaartussaatitaaneq pillugu assigiinngisuttaa atuarsinnaavat saamiatungaani iserfissaq iserfigalugu.


Kommuni nalunaarutisigaangat 

Inatsit naapertorlugu meeraq immikkut tapersersorneqarnissamik pisariaqartitsisoq pillugu kommuni nalunaarummik tigusaqaruni iliuuseqarnissamut pisussaaffeqarpoq. Meeqqap kinguaassiuutitigut atornerlunneqarnera pillugu pasitsaassinissamut ernumanissamulluunniit tunngavissaqarpat, kommuni immikkut pisussaaffeqarpoq.

Nalunaarutip tiguneqarsimaneranut uppernarsaat
Kommuni nalunaarummik tigusaqaruni taassuma tiguneraniit kingusinnerpaamik sap. ak. qaangiunnerani tiguneranut nalunaaruteqartumut uppernarsaammik nassiussinissamut pisussaaffeqarpoq.

Isumaginninnikkut misissuineq
Kommuni nalunaarummik tigusaqaruni isumaginninnikkut misissuinissaq pisariaqarnersoq aalajangissavaa. Isumaginninnikkut misissuinerup meeqqap pisariaqartitaa takutissavaa, meeqqamullu eqqortumik tapersersuinissamik toqqaasoqarnissaanut peqataassalluni. Tamatuma kingorna kommuni meeqqamut tunngatillugu iliuusissamik pilersaarusiussaaq.

Iliuusissanut pilersaarut meeqqap qanoq tapersersorneqarnissaanik ataatsimut isiginnilersitsivoq qaqugulu tapersersuinerup naammassineqarnissaata naatsorsuutigineqarnissaa tassani nassuiarneqarluni. Meeqqap tapersersorneqarnerani kommuni malitseqartitsinissamut pisussaaffeqarpoq. Kommunip isumaginninnikkut misissuinermi iliuusissatullu pilersaarummik suliaqarnermi meeraq ilaqutaalu peqataatissavai.