ITQ-CA sunaava?
ITQ-CA tassaavoq nammineerluni nalunaarusiornermut atortussiaq, sakkortuumik misigisaqarnerup kingorna kingunerluutit ersiutaannik 11-nik aamma meeqqat inuusuttullu arfineq-marlunniit 17-inut ukiullit sakkortuumik misigisaqarnermik kingorna paasiuminaatsumik kingunerluuteqartut ersiutaannik misissuinermi atorneqartartoq. ITQ-CA sakkortuumik misigisaqarnerup kingorna kingunerluutit ilisarnaatai pillugit arfinilinnik apeqqutinik imaqarpoq (misigisaqaqqittuussisarneq, avaqqutaarinninneq aamma sualuttumik sillimasarneq). Kiisalu imminut pisunut naleqqussarsinnaanermik ajornartorsiuteqarneq pillugu apeqqutinik arfinilinnik imaqarluni (tassanngaannaq iliuuseqartarnermik ajornartorsiuteqarneq, imminut pitsaanngitsumik isigineq aamma inunnut allanut attaveqarniarnermik ajornartorsiuteqarneq). Sakkortuumik misigisaqarnerup kingorna kingunerlutsitsisarneq aamma imminut pisunut naleqqussarsinnaaneq pillugu apeqqutit tamarmik paasiuminaatsumik sakkortuumik misigisaqarnerup kingorna kingunerlutsitsisarnermik misissuinernut atorneqartarput.
Syddansk Universitetimi (SDU-mi) sakkortuumik misigisaqartarnerup kingorna kingunerluutit pillugit ilisimasaqarfiup aamma Meeqqanik katsorsaasut angalasartut suleqatigineqarnerisigut ITQ-CA kalaallisut nutserneqarnikuuvoq Nunatsinnilu paasissutissat qanoq iluaqutaatigisinnaanersut massakkorpiaq misissuisoqarpoq.
ITQ-CA kimit atorneqarsinnaava?
Sulisut tamarmik inuusuttunik sullissisut sullissinerminni ITQ-CA atortarsinnaavaat. Misissuilluni atortoq atorneqaraangami sakkortuumik misigisaqarnerup kingorna kingunerlutsitsinermik aamma sakkortuumik misigisaqarnerup kingorna paasiuminaatsumik kingunerlutsitsinermik misissuutitut atorneqartarnissaa pingaartuuvoq, uagulli sulisutut atortoq taanna aallaavigalugu nappaateqartoqarneranik uppernarsaasinnaanngilagut.
ITQ-CA kalaallisut aamma danskisut allassimasut nittartakkami aaneqarsinnaapput. Misissuutit inernerinik allaffissiaq ilinnut nassiutsikkusukkukku mailimut uunga attaveqarsinnaavutit: iass@nanoq.gl
Misissuut ITQ-CA atorlugu sulinissamut aamma angusat uuttortarnissaannut sulisut pikkorissarnissaat innersuussutigineqarpoq.