Misissuut Miki sunaava?
Misissuut Miki tassaavoq titartakkat atorlugit misissuut, taanna meeqqanit 6-iniit 12-inut ukiulinnut atorneqarsinnaasoq. Misissuut Miki atorlugu misissorneqarsinnaavoq meeraq PTSD-mut kompleks PTSD-mullu ersiuteqarnersoq. Timikkut persuttartittarnerup imaluunniit kinguaassiuutitigut atornerlunneqarnerup kingorna kingunerluuteqarnermut misissuut.
Misissuut taanna Nunatsinni Misissuut Mikimik taajuuteqalerpoq, Danmarkimi Thomas-testenimik taaguuteqartinneqarpoq. Nunatsinni sumiorpaluutinut arlalinnut nutserneqarnikuuvoq (Tunumiusut, Kitaamiusut Kujataamiusullu suliarineqareerput, Avannaamiorpaluutinut nalimmassarlugu massakkut suliarineqaleruttorpoq) Nunatsinnilu pissutsinut nalimmassarneqarluni. Misissuummi naleqqussakkat makkuupput: apeqqutit nutaat pingasut aamma assitalersukkat nalimmassakkat nutaat. Kalaallisoortaa massakkut akueriniarneqaleruttorpoq.
Misissuut assinik arlalinnik imaqarpoq taakkunanilu nukappiaraq inuusuttuaraq inuttaritinneqarpoq - kalaallisuuani "Miki"-mik ateqartinneqartoq. Assini nukappiaqqap Mikip sakkortuumik nalaataqarnermi kingorna kingunerlutsitsisartut ilisarnaataannik misigisaqarnera oqaluttuarineqarpoq. Assini tamani Mikip qanoq misigisaqarsimaneranik aallaavilimmik allagartalersukkamik oqaasertaqartarpoq, aamma meeraq misissorneqartoq Mikip misigisaanut assingusumik qanoq misigisaqartigisimanersoq apeqqutigineqartarluni. Taassuma saniatigut misissuut misigissutsikkut ajornartorsiuteqarnerup kingorna timikkut anniaateqalernerup ilisarnaatai (naarlunneq niaqorlunnerlu) pillugit apeqquteqarpoq.
Saniatigut meeqqat sakkortuumik misigisaqarsimasut akuttunngitsumik misigisartagaannik apeqqutinik imaqarpoq kiisalu toqumik imminullu toqunnissamik eqqarsaatit pillugit apeqqutinik imaqarluni. Apeqqutit taakkua atorlugit meeqqanik toqu aamma imminut toquttarneq pillugit eqqarsaatersuutinik pigisaqartunik eqqissisimasumik isumannaatsumillu apersuisoqarsinnaavoq, tamanna pitsaasumik sunniuteqartartoq Nunatsinni misissuinerugallartuni takutinneqarpoq. Apeqqutit taakkua meeraq imminut toqunnissamik eqqarsaateqarsimatillugu sulisup erngertumik atuutilersumik iliuuseqarnissaanut periarfissittarpaa aamma meeqqap eqqarsaatit taakkua piviusunngortinniarlugit iliuusissaraluanik pinaveersaartitsisinnaalersittarlugu.
Misissuut Miki kia atorsinnaavaa?
Sulisut tamarmik misissuummik Mikimik ilitsersuunneqarsimasut misissuut Miki atorsinnaavaat aamma allaffissorlutik sulisut atorsinnaavaat. Misissuut Miki atorlugu sulinissamut aamma angusat uuttortarnissaannut sulisut pikkorissarnissaat taamaattumik innersuussutigineqarpoq.
Mikimik Misissuutit kalaallisut aamma danskisut allassimasut nittartakkami aaneqarsinnaapput. Misissuutit inernerinik allaffissiaq ilinnut nassiutsikkusukkukku mailimut uunga attaveqarsinnaavutit: iass@nanoq.gl