Ilaqutariit sanngiitsutut inissisimasut immikkut sammillugit angajoqqaatut piginnaasanik nukittorsaaneq.
Angajoqqaat sanngiitsutut inissisimasut angajoqqaatut piginnaasaannik nukittorsaanissaq siunertaavoq. Tassa imaappoq; meeqqap ineriartorneranik tapersersuineq aamma isumassuineq angajoqqaanut ilinniartinneqassapput. Taamaattumik suliniutip 1-p makkua sammivai;
- Suliniut MANU ilaqutariinnut sanngiitsutut inissisimasunut sammitinneqarpoq. Taassuma ilaqutariit tamarmik pisarialimmik angajoqqaanngornissamut piareersarnermut peqataanissaannik qulakkeertarpaa.
- Kommunit inunnik MANU-mik ataqatigiissaarisunik imaluunniit innuttaasut pisariaqartitsisut angerlarsimaffiinut pulaartarsinnaasut atorfinitsisinnaavai.
- MANU meeqqat 5-nik 6-innik ukiulinnut aamma sianneqarpoq.
Sulisugut MANU pillugu suleqatigiittartut suliniutip piffissalersugaanerata nalaani MANU-p sianneqarnissaanik immikkut ittumik sammisaqarput. Taamaaliorpugut innuttaasut tamaasa angusinnaajumallugit - aamma ilaqutariit sanngiitsutut inissisimanerusut.
Massakkorpiaq suliniut MANU+ suliarivarput. Suliniut innuttaasunut sanngiinnerusutut inissisimasunut siullertut pingaarnertullu sammitinneqarpoq.
- Taamatut sulineq kommunini peqqinnissaqarfimmilu sulisunik akuutitsinissamik pisariaqartitsivoq. Taamaattumik kommunini assigiinngitsuni sulisut ataatsimeeqatigereerpavut. Ataatsimiinnerit isumassarsianik pissarsinissaq, isumasioqatigiinnissaq aamma inerisakkavut pillugit utertitsilluni ilisimatitsinissaq siunertarivaat, taamaalilluta suliniut sulisunit atorneqarsinnaallunilu innuttaasunut attuumatinneqarnissaa qulakkeerniarsarivarput.
Taakkua saniatigut MANU-p nunami maani qanoq atorneqartarnera misissorlugu aallartereerpugut. Sulilluni angalanerit aamma MANU pillugu ilinniartitsisartut kommuninilu attaveqaataasut aqqutigalugit taakkua pisarput.
Illoqarfiit assigiinngitsut iluini MANU pillugu ilinniartitsisartut, pisariaqarsorigaangatsigu, ornillugit aamma tapersersortarpavut. Soorlu assersuutigalugu decembari 2022-imi Aasianniippugut, taamanikkut najukkami MANU pillugu ataqatigiissaarinnittartut MANU pillugu isumasioqatigiisitsinerini tapersersorpavut.
Kommunit tamarmik MANU pillugu ataqatigiissaarinnittartut atorfeqartinneqarnerinut aningaasat atortarpaat. Sulisut attaveqaatitut paasissutissartai pissarsiarisimasagut ingerlaavartumik suliai pillugit attaveqarfigisarpavut. Tasiilami aamma Aasianni MANU pillugu attaveqaataasut februaarip qaammataani sanileralugu ilinniartillugit ullut arlallit atussallugit pilersaarusiornikuuvugut. Nunami najukkanit assigiinngitsunit MANU pillugu ataqatigiissaarinninneq pillugu misilittakkat paarlaaqatigiissutiginiarlugit peqataasut imminnut ilinniarnerlutik Sisimiuliarput.
MANU-p paasissutissartai qanoq pitsanngortissinnaanerlugit immikkut ittumik anguniagalimmik ukioq manna sulissutigivavut. Paasissutissat innuttaasunut sulisunullu tamanut isumaqarluartuunissaat kissaatigaavut.
