Kommunimi sullissisut aamma peqqissaanermik suliallit Siusissukkut Iliuuseqartartoqatigiinni ilaasut suleqatigiinneri nukittorsarneqarpoq
Siusissukkut Iliuuseqartarnermi suliaqarfiit assigiinngitsut suleqatigiinnerinik nukittorsaanissaq siunertaavoq, ilaqutariit inuuniarnermikkut atugarliortut siusissukkut paasineqartarneri sulinermi tassani sammineqartarpoq. Suliaqarfiit assigiinngitsut suleqatigiinnerini ilaqutariit pillugit sullissineq nukittorsarneqassaaq; sullissisut attuumassutillit akornanni eqaatsumik ataqatigiissaarisoqassaaq aamma ilaqutariinnut ataqatigiilersitsisoqassaaq. Suliniutip 2-p makkua taamaattumik sammivai:
- Suliaqarfiit assigiinngitsut suleqartigiinnerini ilaqutariit inuuniarnermikkut atugarliortut siusissukkut paasineqartarnissaannik Siusissukkut Iliuuseqartarluni sulinerup allaaserineqarneranik nutarterineq.
- Nuna tamakkerlugu siunnersuisarnerup nukittorsarneqarnera.
- Najukkami ilisimasat, suliaqarfiit assigiinngitsut isumasioqatigiinnissaat, peqataatitsinerup qulakkeerneqarnissaa kiisalu inerisaanermut isumassarsiorniarluni isumasioqatigiisitsinerit/ workshopertitsinerit.
Siusissukkut Iliuuseqarneq tassaavoq ilaqutariinnut aamma angajoqqaanngornermi kiisalu angajoqqaatut tapersersorneqarnissamik, siunnersortinnissamik ilitsersortinnissamillu pisariaqartitsisunut neqeroorut. Neqeroorut naartunermiit meeqqap marlunnik ukioqalernissaata tungaanut atuuttarpoq.
Isumaginninnermut Aqutsisoqarfimmi Siusissukkut Iliuuseqartartoqatigiittut inissisimanitsinni, pingaarnertut "Ilaqutariinnut naartusortalinnut Siusissukkut Iliuuseqarneq"-mik ataqatigiissaarisarpugut pilersaarummillu inerisaasarluta. Neqeroorut kommunini najukkanit suliarineqartarpoq, uagulli siunnersortinnissamik aqqutissiuunneqarnissamillu pisariaqartitsisoqaraangat piareersimasarpugut.
Sulinit 2-mi sulinitsinnut pingaarutilik ataaseq tassaavoq Siusissukkut Iliuuseqartartoqatigiinni suleqatigiinnerit nukittorsarneqarneri.
Siusissukkut Iliuuseqartartoqatigiit najoqqutassiaat suliarileruttorparput. Najoqqutassiaq taakkua sulinerisa allaaserineqarnerisa nutarterneqarnerattut atuutissaaq aamma sulinerinut suliaqarfiillu assigiinngitsut suleqatigiinnerinut iluaqutaaniassagami suleriutsimik ilitsersuutinillu imaqassalluni.
- Najoqqutassiap ulluinnarni atorneqartarnissaa qulakkeerniarlugu suleriutsimi uani Siusissukkut Iliuuseqartartoqatigiinni sulisut attuumassutillit akuutinneqassapput.
Suleqatigiinnermik nukittorsaaneq allatut iliorluta misilittartarparput, tassalu Siusissukkut Iliuuseqartartoqatigiinnik nuna tamakkerlugu isumasioqatigiisitsisarpugut. Eqimattat assigiinngitsut imminnut isumasioqatigiissinnaaniassammata, suliaminnik saqqummiussisinnaaniassammata aamma Siusissukkut Iliuuseqartarnerup qanoq nukittorsarneqarsinnaaneranik isummatik saqqummiussinnaaniassammatigit taamaaliortarpugut.
Ilulissani septembar 2022-imi siullermeerluta isumasioqatigiisitsivugut. Peqataasut isumasioqatigiinnermik nalilersuinerisa takutippaat assut naammagisimaarinnittut. Sisimiuni Siusissukkut Iliuuseqartartoqatigiit ajoraluartumik silamik peqquteqarlutik anngutinngitsoorput. Taamaattumik eqimattaq taanna naalisakkamik isumasioqatigiisinniarlugu januaarimi Sisimiuliarpugut.
Siusissukkut Iliuuseqartarneq pillugu isumasioqatigiinnissaq massakkut pilersaarusiorparput, taanna 2023-imi sapaatip-akunnerani 40-mi pisussaavoq.
Siusissukkut Iliuuseqartartoqatigiit tapersersorneqarnissaminnik siunnersorneqarnissaminnillu pisariaqartitsilernerini ingerlaavartumik attaveqarfigisarpavut. Taakkua saniatigut illoqarfinnut nunaqarfinnullu assigiinngitsunut ornigulluta Siusissukkut Iliuuseqartartoqatigiit sulinerinik tapersersuiartortarpugut ataatsimeeqateqartarlutalu. Makkua ilaatigut tikeraarfigereerpavut:
- Sisimiut, Uummannaq, Aasiaat og Ilulissat, Qaqortoq, Nanortalik, Narsaq aamma Nuuk
