Kommunini sullissinermik tapersersuineq
Una siunertaavoq; Kommunini sulianik suliaqartarneq pitsanngortissallugu, taamaalilluni meeqqat inuusuttullu inuuniarnermikkut atugarliortut pisariaqartitsilerunik piffissaq eqqortoq ikiorserneqarlutillu tapersersorneqartarsinnaalissapput. Tamanna kommunini tallimani sullissisut aqutsisuisalu isumaginninnikkut sullissinermi assigiiaanik arlariinnillu sakkussaqartitsinikkut pissaaq.
Iluatsitsinermut uuttuutit::
- Meeqqanik tapersersuisarnermut inatsit naapertorlugu sullisinissamik pikkorisaasoqareersimasasoq kiisalu kommunini tamani allanik qulequtaqarluni kiisalu sanileralugu 2023-p naalernerani ilitsersuisoqareersimassasoq. Tamanna sioqqullugu kommunini sisamaasuni inatsit aallaavigalugu septembar 2021-imi pikkorissaasoqarpoq, pikkorsaanerit taakkua Suliniut 5-imut atasuupput, kommunit illoqarfinnit tamanit sulianik suliaqartartut tamaasa pikkorissaanissamut katersortarpaat. Kommunit kingullersaat 2022-imi pikkorissaavigineqarpoq.
- Kommunini tamani 5-ini Get Organized 2022-p naanerani atuutilersinneqariissasoq. Piffissami suliniutip atuuffiani kommunit Get Organizedimik atuilersimanissaat aamma meeqqat inuusuttullu suliaqarfiini suliat taassuminngaannavik atuilersimanissaat anguniagaapput.
2022-p aallartinneraniilli ESDH pillugu aaqqissuussaq Get Organized kommuninit tallimaasunit sisamani atuutilersinneqarpoq: Qeqqata Kommunia, Kommune Qeqertalik, Avannaata Kommunia aamma Kommune Kujalleq. Kommuneqarfik Sermersuup Get Organized atoreerpaa, taamaattorli meeqqat suliassartaannik app-eq aaqqissuussami nutaartaasoq atulertussaavaa. Ukiaq 2022 Sermersuumiinnissaq pilersaarutaaqqaarpoq, kommunilli atuutilersitsinissaq 2023-imut kinguartittariaqarsimavaa. Tamanna kommunimi qarasaasiatigut unamminartoqarneranik ilaatigut peqquteqarpoq.
Aaqqissuussaap nutaap aallartisarneqarnerani allannguisoqartillugu aqutsineq aqutsisunut sapaatip akunnerani pikkorissaassutigineqartarpoq. ESDH pillugu aaqqissuussap atuutilersinneqarnerani qanoq aqutsinissaminnut sakkunik pikkorissarnermi tuniorarneqartarput. Tassunga tullinnguuttarpoq kommunimi sulianik suliarinnittartut tamarmik ulluni arfineq-pingasuni atuartinneqarneri – inaarutaasumik atuisutut ilinniartinneqarneri. Pikkorissaanerit Isumaginninnermut Aqutsisoqarfimmi Suligasuartittakkani sulisut marluk illoqarfinnut tamanut ornigullutik sapaatip akunnerani ataatsimi marluunniluunniit sanileralugu ilitsersuitillugit naggaserneqartarpoq.
Atulersitsinermiit qaammatit arfinillit qaangiunnerini kommunini tamani malitseqartitsisoqartarpoq, taamaattorli piffissap akornani ingerlaavartumik killiffik pillugu kommunit tamarmik qarasaasiaq atorlugu ataveqarfigineqartarput. Tassani isummersuutaat aallaavigalugit kommunit ataasiakkaat pisariaqartitaannut naapertuuttumik kommunini tamani immikkut aaqqissuussisoqartarpoq.
Get Organized-imut ilitsersuut aaqqissuussaq GLUU atavoq, tassani suliamik suliaqartartut suliat ilisarnaataannik tamanik takunnissinnaapput kiisalu suliat ataasiakkaat sumut killiffiinik ilitsersuutinik ujaasisinnaallutik.
2023-imi makkua sammivavut:
- Meeqqat inuusuttullu suliaqarfianni sulianik suliaqartartut suliaasa immikkut ittumik sammillugit aqunneqarneri pillugit ilisimasat sakkussallu, soorlu assersuutigalugit aqutsisutut nakkutilliineq.
- Piffissami atuutilersitsinermi misilittagaqalernerup kingorna aaqqissuussaq pillugu aalasunngorlugu ilitsersuusiorneq.
- Sulianik suliaqartartut tamarmik sulianik kinguaassiuutitigut atornerluinermut tunngassutilinnik suliarinnittalernissaannik pikkorissaanerit.
- Ilaqutariit illui aamma ilaqutariit sullissivii suleqatigalugit 2023-mi aamma tamanna sammineqassaaq.
Get Organized-ip atuutilersinneqarneranut atasumik malitseqartitsilluni tikeraarnermi ukua tikinneqareerput:
- Qeqqata Kommunia
- Kommune Qeqertalik
- Avannaata Kommunia
- Kommune Kujalleq
Kommunit aaqqissuussamik tigusilluarput aamma naak qarasaasiatigut digitalimillu atuilluni suliaqartalerneq unamminartaraluartoq kommuninit utertitsilluni nalunaarnerit ataatsimut isigalugu pitsaasuupput.
Inaarutaasumik ilinniartitsinerit nalilersorneqarnerisa makkua paasinarsisippaat:
- Sulianik suliaqartartut ataatsimut oqarput aaqqissuussami suliat tulleriiaarlugit suliarinnittarneq paasinarluartuusut
- Aaqqissuussap namminneq sulianik suliaqartarnerinut tapersersortaraatik
- Aaqqissuussap atornissaannut kajumissuseqalersittaraatik.
Aaqqissuussaq ESDH-p iluani (Get Organized-imi) immersugassat pioreersut pitsaassusaat ukiakkut 2021-mi qulakkeerpavut nutaanillu taarsersorlugit. Immersugassat assigiinngitsut misissorpavut aamma naqqissorpavut, taarsersorlugit aasakkullu 2022-imi immersugassat ilassutaat aaqqissorlutigit.
