Suliniut 9

Ilaqutariit illuini meeqqanut inuusuttunut taakkualu ilaqutaannut suliniutit anguniagalersorneqassapput.

Ilaqutariit illuisa sulinerisa pitsaassusaat qulakkeerniarlugu Suliniummi pingasunut immikkut ukununnga anguniagalersorneqarput:

• Ilaqutariit illuisa suliffeqarfittut sinaakkutai inerisarneqassapput aamma inatsit aaqqissuusseqqinnerlu atorlugit nukittorsarneqassallutik.
• Ilaqutariit illuisa suliaasa ilisarnaataat pitsanngorsarneqassapput, pingaarnertut suliassat, suliniutit, neqeroorutit sullitallu oqaasertalersorneri sinaakkusersornerilu uani ilaapput.
• Ilaqutariit illuisa piginnaasaannik inerisaaneq nukittorsarneqassaaq.

• Nuna tamakkerlugu aqutsisut attaveqaataat sisamariarlutik ataatsimiisinneqarput.
• Ataatsimoorussamik suliat ilisarnaataannik nalunaarut (Naalakkersuisoqarfik).
• Najukkami aqutsisut attaveqaataannik pilersitsineq.
• Kommunini assigiinngitsuni aqutsisut attaveqaataannik pilersitsineq.
• Qitiusoqarfiit katitigaanerinik aamma najugaqarfinni attaveqaatinik aqutsineq aalajangersaanerlu (Naalakkersuisoqarfik).

Piffissami Suliniutip ingerlanneqarnerani tamarmi ilaqutariit illuisa isumasioqatigiinnissaasa pilersaarusiorneri piviusunngortinnerilu sammivavut, taamaaliorpugut ilaqutariit illuini aqutsisut katersorniarlugit aamma ilaqutariit illuinik assigiinngitsuni attaveqaasersornissaannik isumasioqatigiinnissaannillu periarfissinniarlugit kiisalu unamminartuutiminnik iluatitaminnillu eqqartuisinniarlugit

Kommuninit tamanit sinniisuutitaqarluni (fag-chefit, ilaqutariit illuini aqutsisut taakkualu tullersortaat) isumasioqatigiisitsinitsinni peqataatitaqartarneq misigivarput. Ilaqutariit illuinit ataasiakkaanit suliat/ misilittakkat pitsaasut pillugit saqqumiisoqakkajuttarpoq, soorlu makkunannga:

• Maniitsumi “suleqatigiinneq pitsaasoq”
• Narsami “meeraq qitiutillugu”
• Sisimiuni ”ataatsimoorussamik suliat ilisarnaataannik suliaqarneq”

Saqqummiussat assigiinngitsut ilaqutariit illuini sulisunit aqutsisuniillu isumasioqatigiisitsinitsinni amerlanertigut nuannarutigineqarnerpaasarput ilaqutariillu illuinut allanut isumassarsiorfiusarlutik. Peqataasut isumasioqatigiisitsinerni marluusuni peqataasut assut nammagisimaarinnittut eqikkaanitsinni takusinnaavarput.

Isumasioqatigiisitsinermi siullermi aqutsisut attaveqaataat immikkoortunut pingasunut siunissami immikkoortiterneqartassasut isumaqatigiissutigineqarpoq:

• Nuna tamakkerlugu aqutsisut attaveqaataat (ilaqutariit illuisa isumasioqatigiisinneqarneri,) tassani ilaqutariit sullissiviini aqutsisut, ilaqutariit illuini aqutsisut aamma kommunini tallimaasuni fagchefit tamarmik ukiumut ataasiarlutik-marloriarlutik naapittarput.
• Kommunini assigiinngitsuni suleqatigiisitaq, - isumasioqatigiisitsinerup imaanik ilusaanillu isumaqatigiissutaasunik nuna tamakkerlugu aqutsisut attaveqaataanni allatullu attuumassutilimmik suleqataasarpoq, soorlu Suliniut 9-mi suliniutip tunniussuutaanik pitsaassusilersuilluni sulinermi peqataasarluni.
• Kommunini tallimaasuni najukkani aqutsisut attaveqaataat namminneerlutik ataatsimiittarnissaminnut akisussaaffeqartarput, amerlanertigut qaammammut ataasiaarlutik ataatsimiittarlutik.

Attaveqaatit immikkoortui pingasuusut 2021-p naaneraniilli sulillutik aallartipput.

Ilaqutariit sullissiviiinit tamanit 2022-im isumasioqatigiisitsereerluta isumassarsianik pissarsinitta kingorna suliat tunngaviusumik ilisarnaataat (siusinnerusukkut ataatsimoorlugu suliat ilisarnaataat) 2022-mi aamma 2023-imi itisilernerullugit suliarivagut.

VIVE ilaqutariit sullissiviinik itisiliilluni misissueqqissaarpoq, taanna Sisimiuni juuni 2022-imi isumasioqatigiisitsinermi saqqummiunneqarpoq. Kommunit ataasiakkaat unamminartuutaat pisariaqartitaallu immikkut ittumik misissoqqissaarneqarput. Misissueqqissaarnerup suliat tunngaviusumik ilisarnaataannik suliaqarneq tapersersorpaa, taanna kommuninik aamma kommunini assigiinngitsuni suleqatigiissitamik suleqateqarluta suliarivarput.

Maajimi ilaqutariinnik sullissiviit tulliani pingajussaanillu isumasioqatigiisinneqassapput, tassanilu ilaqutariinnik sullissiviit ataasiakkaat piginnaasaanik inerisaanissamik sulineq sammineqassaaq, ilaatigut sanileralugu ilitsersuussinermi attaveqaataasut misilittagaat tunngavigineqassallutik.

Nuna tamakkerlugu ilaqutariinnik sullissiviit marloriarlugit 2021-imiilli isumasiortinneqarput

• Nuummi oktobar 2021-imi
• Sisimiuni juuni 2022-imi

Ilaqutariinnik sullissiviit tulliani nuna tamakkerlugu isumasioqatigiisinneqassapput Qaqortumi maaji 2023-imi.

Kommunit ilai sanileralugu ilitsersuussisut attaveqaataat misileraatiginikuuvaat. Kommunit ataasiakkat assigiinngitsut imaluunniit iluminni sulisumik, sanileralugu ilitsersuussinermik immikkut piginnaasalimmik, atortarsimapput. Periuseq taanna nuannersumik misilittagaqarfigineqarmat, Isumaginninnermut Aqutsisoqarfiup kommunit kommunini allani periutsimut assigusumik aningaasanik 2022-imi qinnuteqarsinnaaneri neqeroorutigisimavai. Taamaalilluni ilaqutariit aqqutissioqatigiisinneqartarneri pillugit misilittakkanik paarlaasseqatigiinniarluni Danmarkimut 2022 decembarimi tikeraarnissaq aaqqissuunneqarpoq, tassunga kommunit peqataanissaminnut neqeroorfigineqarput.

Kommunit assigiinngitsut suleqatigiissitaat, Isumaginninnermut Aqutsisoqarfimmit ataqatigiissaarneqartoq, ukiakkut 2021-imiilli ingerlavoq. Suleqatigiissitaq suleqataasut assigiinngitsut isumasioqatigiinnissaannut, Isumaginninnermut Aqutsisoqarfiup sulinerup pitsaassusissaanik piumasaqaataanik suliaqarneranut aamma ilaqutariinnik sullissiviit isumasioqatigiisinneqarnerisa imassaanik pilersaarusiornermut tapertaasimavoq.