Meeqqanik inuusuttunik isumaginninnermi piginnaasat pioreersut aamma piginnaasat ineriartortinneqarnissaannik neqeroorutit takussutissartaat
Siunertaq unaavoq:
- Meeqqat inuusuttullu suliassaqarfiini piginnaasat aamma piginnaasanik inerisaanissat kommuninit takuneqarsinnaalersinnissaat aamma kommunit pisariaqartitaanut naapertuuttumik neqerooruteqartoqarnissaanik qulakkeerinninnissaq. Isumaginninnermut Aqutsisoqarfiup nittartagaa aqqutigalugu kommuninut Isumaginninnermut Aqutsisoqarfiup pikkorissaanissaminik neqeroorutai pillugit paasissutissanik pissarsiniarneq aamma pikkorissaanermi peqataatitsinissamut nalunaarnissaq ajornannginnerulissapput.
- - Isumaginninnermut Aqutsisoqarfiup nunamilu ilinniartoqarfiit ilinniartitsissutiginiagaasa imminnut ataqatigiinnerunissaanik pilersitsineq. Taamaalillutik pikkorissarnerit ilinniarnerillu imminnut nangittutut inissinneqarsinnaalissapput. Ilinniakkat nutaat imaluunniit massakkut pikkorissaassutissat nalimmassarnissaannut tamanna aamma periarfissiissaaq.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik aamma Isumaginninnermut Sulisoqarnermullu Nunami Namminermi pissutsinut Naalakkersuisoqarfik suleqatigalugit isumaginninnermi ikiortitut ilinniarneq nutaaq PI/SPS-mi ukioq ataaseq ingerlasartussaq 2022-mi aallartitseqataaffigaarput. Ilinniarnerup nutaap pilersinneqarnerata ulloq unnuarlu paaqqinniffinni aamma innarluutillit ulloq unnuarlu paaqqinniffiini sulisut ilinniarsimanngitsut suliatigut piginnaasaasa pitsanngorsarneqarnissaat periarfissippai allamik ilinniakkamik aallartitsinissaannut periarfissinngikkaluarlugit. Sulisut inuussutissarsiutigalugu misilittakkatik piginnaasatillu allat, piginnaasanik nalilersuinermi erseqqissumik qulaajaaffigineqartut, tunuliaqutaralugit ilinniarnermut nutaamut akuerisaasarput. Ilinniarnerup ingerlanerani sulilluni sungiusarneq suliffianni pisarpoq taamaattumik sulisitsisumut sulisut ilinniartinneri iluaqutaasarput, tassami ilinniartut/sulisut atuagarsornerit ilisimasallu nutaat ilinniaatigalutik misilittartarpaat.
Piginnaanngorsarnissamik piginnaasanillu inerisaanissamik periarfissat pioreersut Isumaginninnermut Aqutsisoqarfiup neeroorutigisartagai taamaattumik ilusilersorpavut. Taassuma malitsigisaanik sammisat ullorsiutaat ingerlaavartumik nutarterneqartalertoq kommunini isumaginninnermut pisortanut nassiuttalerpagut. Tamatuma kommunit taakkualu paaqqinnittarfiutaasa isumasioqatigiinnerit, pikkorissaanerit workshopertitsinerit sorliit Isumaginninnermut Aqutsisoqarfiup ingerlatissanerai aamma kikkunnut sammitinnerai takussallugit periarfissappai. Taassuma saniatigut ullorsiut Isumaginninnermut Aqutsisoqarfiup iluani tamanik takussutissatut atorneqartarlunilu pilersaarusiornermi sakkutut atorneqartarpoq. Sammisat ullorsiutaat tamanit takuneqarsinnaanngorlugu uunga aamma ilineqarnikuuvoq: www.socialstyrelsen.gl/kursuskatalog
Meeqqat inuusuttullu isumaginninnermik suliaqarfiit iluini piginnaasanik inerisaanissamik pisariaqartitsinerit 2022-imi martsimiit augustimut assut sammivavut. Taamaattumik kommunit ilisimasaat, pikkorissaassutinik piginnaanngorsaanernillu, Isumaginninnermut Aqutsisoqarfiup neqeroorutigisaanik, atuineri pisariaqartitseratarsinnaanerilu qulaajarpagut.
Forstanderit marts 2022-imi isumasioqatigiisinneqarnerini aamma ilaqutariit sullissiviisa juuni 2022-mi isumasioqatigiinnerini apersuisarluta immersugassallu apeqqutitallit atorlugit paasissutissanik katersivugut. Sapinngisamik siammasinnerpaamik sinniisunit paasisaqarusulluta ulloq unnuarlu paaqqinniffinni, innarluutilinnut ulloq unnuarlu paaqqinniffinni, ilaqutariit illuini/ sullissiviini sulisunut aamma kommunini isumaginnittoqarfimmi meeqqanik inuusuttunillu sullissisunut immersugassat apeqqutitallit 2022-imi juulimi nassiuppavut.
Paasissutissarpassuit misissoqqissaarnerisa kingunerisaanik Isumaginninnermut Aqutsisoqarfimmi aqutsisoqatigiinnut aamma Meeqqanut, Inuusuttunut Ilaqutariinnullu Naalakkersuisoqarfimmut pikkorissarnissamik pisariaqartitsinerit aalajangersimasunik innersuussutitalerlugit saqqummiunneqartussanik nalunaarusiorusiortoqarpoq. Taamaaliortoqarpoq kommunini paaqqinnittarfinnilu sulisut pisariaqartitaannut siunissami pikkorissaassutissat nalimmassarsinnaaqqullugit aamma pingaarnersiorsinnaaqqullugit.
Isumaginninnermut Aqutsisoqarfiup nittartagaani pikkorissaassutissat isertarfiannik pilersitsinissaq 2023-mi suliarineqarpoq. Piginnaasanik inerisaanissamik neqeroorutit assigiinngitsut neqeroorutigut itinerusumik tassani atuarneqarsinnaalissapput, taamaalillutillu sulisut neqeroorutinut attuumassutilinnut nalunaarsinnaalersinneqassapput.
Piginnaasavinnik nalilersuinerit (RKV) 2021:
Perorsaasunngorniat Ilinniarfiat (PI/SPS) suleqatigalugu november/december 2021-mi piginnaasavinnik nalilersuinerit (RKV-mi ingerlanerit) marluk ingerlanneqarput, peqataasunit 24-nit 17-it naammassillutik. RKV-mi ingerlanerit peqataasut piginnaasatik aamma ilinniarfinnut ingerlaqqinnissamut periarfissatik pillugit paasititsipput. Peqataasut ilaatigut tassaasimapput perorsaasunut ikiortit, ilaqutariinnik katsorsaasut ilinniagaqarsimanngitsullu, illoqarfinnit Ilulissaneersut, Qaqortumeersut, Sisimiuneersut, Tasiilameersut, Upernavimmeersut aamma Nuummeersut.
Pisariaqartitanik qulaajaaneq 2022:
Suliaqarfinni assigiinngitsuni inuit 22-t paasissutissanik katersuiffigineqarput aamma misissueqqissaarfigineqarput, ukunani sulisuusut:
- Ulloq unnuarlu paaqqinniffinni aamma innarluutilinnut ulloq unnuarlu paaqqinniffinni aqutsisut arfineq-marluk
- Ulloq unnuarlu paaqqinnittarfinni aamma innarluutilinnut ulloq unnuarlu paaqqinniffinni sulisut pingasut
- Ilaqutariit illuini/sullissiviini aqutsisut arfineq-pingasut
- Kommunini Isumaginnittoqarfinni aqutsisut/pisortat sisamat
Immersugassat apeqqutitallit 155-t suliaqarfinnut makkununnga agguataarneqarput:
- Ulloq unnuarlu paaqqinniffinni aamma innarluutilinnut ulloq unnuarlu paaqqinniffiinni aqutsisut 27-t
- Ulloq unnuarlu paaqqinniffinni aamma innarluutilinnut ulloq unnuarlu paaqqinniffinni sulisut 31-t
- Ilaqutariit illuini/ sullissiviini aqutsisut 26-t (aamma Isumaginnittoqarfinni pisortat/aqutsisut)
- Ilaqutariit illuini/ sullissiviini sulisut 31-t
- Kommunini Isumaginnittoqarfimmi sulisut 40-t
Nalunaarusiaq – suliassanut tunngatillugu
piginnaanngorsartoqarnissaanut innersuussut
Ulloq unnuarlu paaqqinniffinni aamma innarluutillit ulloq unnuarlu paaqqinniffiini, ilaqutariit illuini kommuninilu isumaginnittoqarfinni meeqqanik inuusuttunillu sullissisut aqutsisullu 2022-imi pisariaqartitaannik qulaajaaneq aallaavigalugu nalunaarusiaq suliarineqarpoq. Innersuussutit anguniagallit saqqummiussinnaaniarlugit siammasissumik inissisimaffinniittunik peqataatitsereerluta paasissutissat pissarsiarinissaat qulakkeersimavarput.
Nalunaarusiap siunertaa tassaavoq Isumaginninnermut Aqutsisoqarfimmi aqutsisooqatigiit nunami maani ulloq unnuarlu paaqqinniffinni, innarluutillit ulloq unnuarlu paaqqinniffiini, ilaqutariit illuini aamma kommunini isumaginnittoqarfinni sulisut aqutsisullu suliassatigut piginnaasaanik qanoq iliorlutik pikkorissaasassanersut aamma pisariaqartitaannik suliaqartassanersut innersuussutinik arlalinnik saqqummiussinissaq.
Meeqqanik inuusuttunillu suliaqarfimmi suliatigut piginnaanngorsaanissamut innersuuttutit ilanngullugit nalunaarusiami atuakkit.
