Ulluunerani neqeroorutini sulisunik pikkorissaaneq piginnaasanillu ineriartortitsineq
Siunertaq tassaavoq:
- Suli atualinngitsunut suliassaqarfik ulloq unnuarlu paaqqinnittarfinni perorsaasunut aqutsisunullu, ulluunerani paaqqinnittunut - kiisalu angerlarsimaffimmi paarsisartunut aamma kommunini ingerlatsivinnut paasiniaasarnermut ataatsimut periutsit, meeqqanik aarlerinartorsiortunik sumiginnagaasunillu pinaveersaartitsineq iliuuseqarnerlu pillugit ataatsimoorussamik ilisimasanik ineriartortitsinermillu piginnaanngorsaanissaq.
- Nuna tamakkerlugu ulluunerani neqeroorutini sulisut ilinniarsimassutsimikkut inuttullu piginnaasamikkut pitsaanerusumik pikkorissarneqassapput meeqqat sumiginnakkat, atugarliortut kinguaassiuutimikkullu kanngutsaattuliorfigitittartut ilisarnaataannik takunnissinnaanerminnut. Siusissukkut tapersersuineq suliaqarnerlu ingammik aallartissinnaajumallugit taamaaliortoqassaaq.
Kommunini tallimaasuni ulluunerani neqeroorutini sulisut atugarliortunik paasiniaasarnermut piginnaanngorsarlugit angalatittakkavut 2023-imi sapaatip akunnera 12-imiilli piginnaanngorsaajartortarput. Massakkut (marts 2023) ulluunerani neqeroorutini aqutsisut, aqutsisut tullersortaat sulisullu 254-it piginnaanngorsartinneqareersimalerput. Illoqarfinni nunaqarfinnilu amerlanngitsuni piginnaanngorsaanerit silamik peqquteqartumik kinguartinneqartarput.
Ulluunerani neqeroorutini sulisut 54%-ii massakkorpiaq ilinniarsimasuunngimmata uagut sulinerput immikkut ittumik attuumassuteqarpoq. Sulisut 16%-iinai perorsaasutut ilinniarsimasuupput.
Piginnaanngorsaalluni pikkorissaasarnerput uagut "kuffertimik" taagukkatsinnik tunngaveqartarpoq. ”Kufferti” uagut sakkoraarput, taannalu pikkorissariaatsinut marlunnut avinneqarnikuuvoq:
- Pikkorissaariaaseq 1 tassaavoq aqutsisunut aqutsisullu tullersortaannut sammisoq. Kufferti immikkut ittumik sammineqartarpoq.
- Pikkorissaariaaseq 2 ulluunerani neqeroorutini sulisunut sammivoq aamma kufferti itisiliiffigalugu sammineqartarpoq.
Kuffertip qulequttat makkua imarai:
- Avatangiisit atorlugit ilinniartitsineq
- Angajoqqaanik suleqateqarneq
- Meeqqap mappia
- Suliat aallaavigalugit aqutsineq
Qulequttani tamani siusissukkut paasiniaaneq sammineqartarpoq.
Suliamut maniguunnissaq aamma paaqqinnittarfiit inissisimaffiiniitsillugit naaperiarnissaat sulinitsinni misilittarparput.
Piginnaanngorsaaniaraanni Ingerlatsivinnik suleqateqarnissaq pingaartuuvoq. Taakkua "kufferti"-mik piginnittutut inissisimanissaat assut pingaartuuvoq. Soorlu assersuutigalugu ingerlatsivik ulluunerani neqeroorutini aqutsisut isumasioreerlugit qulequttat ulluunerani neqeroorutini ataasiakkaani sunut piginnaanngorsaasoqarnissaanik kissaateqartoqarnersoq aalajangersaasarpoq. Aamma ukiup qanorilinerani ulluunerani neqeroorutaatitik piginnaanngorsaavigissallugit pitsaanerunersoq aamma aalajangertarpaat. Taamatut suleqatigiinnerup malitsigisaanik ingerlatsiviit namminneq siunissami piginnaanngorsaasinnaalissapput, tapersersorneqarnissamik pisariaqartitsinertik atorlugu ikiortillutik.
Najugaqarfiit amerlanerit 2022-mi pikkorissaariaatsimik 1-mik aqutsisut aqutsisullu tullersortaanut sammitinneqartumik pikkorisaaviupput - aamma najugaqarfiit ataasiakkaat sulisui pikkorissaavigineqarput. Pikkorissariaaseq 2 2023-imi sammissavarput taamaalillutalu ulluunerani neqeroorutini tamani sulisut angumerisinnaanerussavavut.
Illoqarfiit nunaqarfiillu aamma savaateqarfiit tamaasa peqataatinneqarnissaat uagut siunertaraarput, taamaalluta nunami maani innuttaasut tamakkerlugit angussavavut. Nunami tamarmi najugaqarfiit tamaasa sapinngisamik anguniarsarivavut aamma sulisut illoqarfimmut qaninnerpaamut piginnaanngorsartikkiartorneqartarput.
