"Kalaallit Nunaani meeqqat inuusuttullu inuuniarnermikkut atugarliortut sullinneqarnerinik inerisaanissaq piorsaanissarlu ataatsimoorluta akisussaaffigaarput. Ataatsimoorluta anguniakkavut angusinnaajumallugit aamma pitsaasumik allannguisinnaajumalluta, sutigut tamatigut suleqatigiilluarnissaq piumasaqaataavoq.
- Heidi Lindholm, Meeqqanut, Inuusuttunut Ilaqutariinnermullu Naalakkersuisoqarfimmi pisortaq.
Meeqqanut, Inuusuttunut Ilaqutariinnullu Naalakkersuisoqarfiup Isumaginninnikkullu Aqutsisoqarfiup Danmarkimi aammattaaq kommunini suleqatit peqatigalugit tapersersuinissaq suliassaraat. Naalakkersuisoqarfiup Isumaginninnermut Aqutsisoqarfiullu kommunit tamaasa immikkut ukiumut marloriarlugit ataatsimeeqatigisarpaat, aamma kommunit tamaasa ataatsimoorlutillugit pisortataqutsisooqatigiillu ukiup affakkaarlugit ataatsimiinnissaat sioqqullugu ataatsimeeqatigisarlugit. Taakkua saniatigut Isumaginninnermut Aqutsisoqarfiup immikkut ittumik sulianik tamanik takunnissinnaaneq suliassaraa, suliaqarfinni assigiinngitsuni suleqatigiinnut suliaqarlutik attuumassuteqartut ikiortarnissai, Suliniutit 1-miit 10-mut aamma 16 Isumaginninnermut Aqutsisoqarfimmit suliarineqartut siumut ingerlanneqarnissaannik qulakkeerinnittarnissaq, kiisalu taakkua ingerlanneqarneri pillugit nalunaarusiortarnissaq. Meeqqanut, Inuusuttunut Ilaqutariinnullu Naalakkersuisoqarfiup pisortaqartigiit aqutsisooqatigiillu kiffartuuttarpai, aamma aqutsisooqatigiinni aalajangerneqartut malitseqartittarlugit. Aqutsisooqatigiinni ilaasortaapput Meeqqanut, Inuusuttunut Ilaqutariinnullu Naalakkersuisoqarfimmi pisortaq, Social- og Ældreministeriaqarfimmi pisortaq,
Justitsministeriaqarfimmi (Inatsisinut atuutsitsinermut ministeriaqarfimmi) immikkoortortaqarfimmi aqutsisoq kiisalu Qeqqata Kommuniani pisortaaneq
Isumaginninnermut Aqutsisoqarfiup Suliniutit 11-t ingerlappai, taakkua isumaginninnerup iluani meeqqanut inuusuttunullu suliaqarfimmiipput. Suliniutit tamarmik immikkut sulisumik ataatsimik arlalinnilluunniit inuttaqarput, taakkua kommuninik, ulluunerani paaqqinnittarfinnik aamma Danmarkimi Isumaginninnermut Aqutsisoqarfimmik suleqateqarput. Kommunini tamani suliniutigineqartut pillugit pitsaasumik suleqatigiinnissaq aalajangiiisuuvoq. Suliniutini sulisut suleqatigisartakkatik tamaasa tikeraartarpaat, qanimullu oqaloqatigisarlugit, taamaaliortarput kommuninut, illoqarfinnut nunaqarfinnullu tamanut sulinerup nalimmassarneqarnissaa qulakkeerniarlugu. Qanimut suleqatigiinnerup siunertaa tassaavoq, meeqqanik inuusuttullu suliaqarfimmi 2023-p kingorna patajaallisaasussanik suliniutinik ingerlatsinermullu suliassanik pilersitsinissaq.
"Kalaallit Nunaanni meeqqanik inuusuttunillu suliaqarfimmi unammilligassat arlallit suliarisinnaajumallugit kommunit tallimat tamaasa, uagut naalakkersuisoqarfipput aamma danskit Isumaginninnermut Aqutsisoqarfiat ukiuni marlunngulersuni maanna suleqatigeersimalerpavut. Suliassaqarfimmit ataatsimit unammilligassat kisermaallugit aaqqinneqarsinnaanngillat, aamma suleqataasut tamarmik soqutiginnillutik sulinissaat apeqqutaalluinnartuuvoq. Kalaallit Nunaanni suliniutit imminnut akilersinnaasussaapput, aamma siunissaq qaninneq, akunnattumik sivisussusilik kiisalu siunissaq ungasinnerusoq eqqarsaatigalugit allannguisinnaasussaallutik. Maannakut suliniutini ataasiakkaani inernerit takusinnaasavut 2023-ip naanissaata tungaanut siunissamilu meeqqanik inuusuttunillu inuuniarnermikkut atugarliortunik sullissiniarnissatsinnut pingaarutilimmik nukittorsaavoq.
- Helene Broberg Berthelsen, Aqutsisoqarfimmi pisortaq (2019-2022), Isumaginninnermut Aqutsisoqarfik
Uani quppersakkami atuarsinnaavatit suut suliniutit ingerlanneqarnersut.
